野川拉麵 (已結業)

元朗「臭渠」呢邊有甜品店、串燒火鍋店、拉麵店，細味發掘，會搵到好野食。第一次食野川拉麵，麵舖細細唔易發覺，舖內似居酒屋格局，有木枱木櫈，牆上放咗幾幅啤酒廣告、手寫餐牌，好有日系feel。男友叫咗汁燒極上和牛稻庭烏冬，一碗5塊薄和牛片，好有牛味，易咬無渣唔靭。烏冬較幼身，煙煙靭靭，好有米感味道。配上豬骨湯，濃郁得嚟唔會一層油喺面，仲有啲芝麻香。我幾鍾意食糖心蛋，一般食拉麵都係配半隻，唔係好夠喉，呢度一俾就俾一隻，無額外收費。切開一半個蛋黃係半凝固狀態，好有香醇嘅蛋味。而我就叫咗豬軟骨拉麵，配芝士湯底。呢度嘅湯底有多兩款選擇，有埋芝士辣湯底揀，算配合潮流。芝士唔止溶喺湯度，有香濃嘅味道，而且拉麵上都舖咗芝士仲喺半溶嘅狀態。夾住麵條食，好似食緊芝士麵咁，好有韓風味道。豬軟骨好腍，連軟骨位都溶化到好似jelly 咁，好多骨膠原嘅感覺！串燒係呢度嘅另一個賣點，呢度有各類啤酒飲，配幾串串燒食，呢件事好「佬」嘅行業，好坦盪盪。呢串燒安格斯牛肉串每粒都有豐富油香，牛味唔太濃，但質感係肥瘦均等，又無根。除咗串燒，仲有炸物可以叫。呢碟炸魷魚鬚無乜炸粉，喺上面灑咗七味粉，夠咸香。而且條條都係幼鬚方便食。