樂天皇朝 (已結業)

樂天皇朝憑著八色小籠包開到周圍都有分店，之前喺銅鑼灣同成班舊同事試過， 今次就同老公兩個係尖沙咀食， 貪佢哋點方便。係加拿芬廣場全層，地方好大好，坐得舒服，亦見到唔少鬼佬喺度食。今次我哋兩個人就淨係叫咗6隻蟹粉小籠包， 李白醉雞 ，酸辣湯 ，鮮蝦雲吞抄手拌麵 ，老乾媽什菌炒牛肉。 外加兩個甜品 宮廷驢打滾， 檸檬蘆薈桂花蜜。蟹粉小籠包係我試過的8色中最愛，有蟹粉的鮮味加上豬肉湯汁， 皮薄餡靚。 李白醉雞並無特別加錢轉脾位， 因為之前食開， 唔係脾位的雞肉都好嫩滑，酒味濃郁。酸辣湯望落有啲細， 但味道好濃郁， 勾芡濃, 酸辣味重。鮮蝦雲吞拌麵， 一開始見唔到啲雲吞，原來放左係底，有4粒左右,都幾大粒。拌麵加入咗辣椒 ，肉碎芫茜，又一道重口味的主食。雜菌炒牛肉，望落好似好細碟咁， 牛肉加青紅椒及雜菇炒，火喉控制得好，冇過火，牛肉嫩滑，好味道。甜品方面桂花蘆薈檸檬蜜 ，我最愛的桂花味被檸檬味蓋過，但整體感覺清新， 頗為有趣。宮廷驢打滾， 對於煙韌控的我來說很有吸引力， 軟黏的糯米皮黏黏包住一層層豆沙餡，很美味。每碟份量唔係好多，但食完之後飽到上心口