桃花源小廚 (已結業)

老公生日指明要食中菜（佢係真漢子），上年食左跑馬地既壹玖捌叄，今年又要做功課睇下有咩中菜好食啦。因為結完婚之後第一個過既生日，所以想揀啲唔係周圍都有得食，特別啲既中菜。見到桃花園小廚既menu幾特別下，再加上之前去上環其實經過過哩間餐廳好多次，次次我地都會話「點解間野開係哩度仲要係地舖既？」，咁有緣所以我就決定左食哩間！Book枱時留左2個玻璃蝦球同埋2隻蟹鉗。之後send埋個openrice link比老公，佢一睇就話「咦！哩間啊！ok！」頭盤送左個皮蛋酸薑比我地。因為老公唔食所以我食哂。皮蛋係靚既溏心皮蛋，但係酸薑係日本餐廳偏淋既酸薑，我以為係爽脆既子薑👉🏼👈🏼... 自己叫左冰鎮鵝肉卷。出乎我老公意料之外地好好味，因為冇食過亦覺得好特別。之後就上左玻璃蝦球。蝦球好大隻！爽甜有蝦味，非常新鮮。豆苗都好香甜。佢另外上左蠔油同蝦醬，我地覺得個蝦醬好味，同隻蝦都好夾。 時間掌握得好好，冇耐就上冬瓜&蛋白蒸蟹鉗。老公話哩個餸好唔抵，但我話生日食好啲同埋唔係周圍有得食（又要好食又特別既中菜真係唔易搵😭我都搵左成日），佢都認同。佢就覺得冬瓜蒸冇咁滯但我覺得2個各有各好。