十十川滬料理 (已結業)

同家姐行完朗豪坊,上咗去呢間位於四樓嘅餐廳食lunch。 係food court 嚟講,呢度算幾大、開揚,坐得舒服。有選擇困難症嘅我提議點呢個幾抵食又多款式嘅二人餐。但家姐話想食酸菜魚,於是由佢發板。✨涼拌萵筍絲口感清爽,酸酸哋,一個幾開胃既前菜。✨雞絲粉皮煙韌嘅粉皮配上雞絲、青瓜同胡麻醫,口感彈牙又爽脆。✨金黃流沙小龍包金黃色嘅皮,包住小肉丸,一口咬落去,鮮甜金黃流沙汁加鮮肉餡好好味！✨招牌老壇酸菜魚家姐就住我,叫咗少辣少麻。魚片肉質嫩滑無骨,唔會一夾就散。湯底麻中帶辣,但又唔會搶咗魚嘅鮮味。除咗魚肉,仲有酸菜、鴻禧菇、大豆牙菜、水晶粉同萵筍等,材料相當豐富,又惹味！✨脆皮鳳梨奶黃窩餅平時食嘅窩餅係豆沙餡料,呢個就用咗鳳梨同奶黃做餡料。新鮮出爐,外面金黃香脆,內裡充滿鳳梨同奶黃香甜,味道幾新鮮。多謝家姐請我食好西,下次我請返佢食一人火鍋酸菜魚先。