郭仔記粥麵專家

營業中

休息中

一向都鍾意食車仔麵嘅我，鍾意周圍試吓唔同嘅車仔麵餐廳，今次經過大埔墟就入去郭仔記試吓。餐廳門口有外賣形式買賣熟食小食，記得呢間鋪頭已經好多年歷史，而且一向多街坊幫襯。座位有卡位同埋中間嘅長枱選擇，去到嘅時候都已經幾乎爆滿，可見非常好生意。點餐以自助形式，首先在枱上面嘅餐紙選擇自己喜好嘅車仔麵配菜同埋麵款，以圈出形式展示比店員，就可以落單。我實在太鍾意食車仔麵啦，當然唔少得揀我最鍾意嘅滷水雞翼、鳳爪、豬大腸、豬紅、紫菜同埋牛孖根等嘅配菜，麵底我就揀咗油麵。賣相非常吸引，好大碗！而且食物非常豐富呀。當中嘅滷水雞翼非常入味，而且肉質鮮嫩，質感非常林。湯底沙嗲汁味道非常濃郁，油麵非常入味，而且有咬口有質感。食完之後真係非常飽啊，而且只係街坊價幾十蚊一碗，真係好抵食。