人和荳品廠

營業中

休息中

講到環境，呢度同其他「人和」的店舖一樣，永遠都係不及格的，地方逼狹，雜亂，沒有空調，也給人一個不夠乾淨的感覺。講到服務，呢度同其他「人和」的店舖一樣，真係一般過一般。唔單止咁，呢間「人和」第八分店仲要係開喺旺角道最旺最多人流的地方，在大熱天時來呢度食嘢真係有一種貼錢買難受的感覺。但係人和有兩樣食品總係令自己耐不耐就會心思思想去幫襯。1）「煎釀豆腐」：雖然喺一d老字號舊式豆腐舖裡面，好多都有賣呢味「煎釀豆腐」，不過呢間舖頭勝在就腳，所以最多幫襯就係呢度。「煎釀豆腐」雖然好似無乜特別，但係剛剛煎起的豆腐，滾熱辣的，外皮脆內裡軟，加上薄薄的所謂「魚肉」，再淋上適當份量的豉油上面夾在口中吃，可真是既美味又富營養呢！2）「韭菜豬紅腸」：不同「煎釀豆腐」，呢一味可算係「人和」的獨家出品，加了大量胡椒粉辟味的湯，加上韭菜、豬紅和豬腸三樣廉價的食品，再在上面洒上一些炸過的蒜粒，竟可產生奇妙的化學作用，使人好像上了毒癮一樣，耐不耐就想來幫襯，真是奇怪！每次來這裡，只要叫這兩寶，加多一杯「薑汁豆漿」添，就已經係一餐平價美食了。