芋圓一 (已結業)

芋圓相信係好多香港人最愛嘅甜品糖水之一，而近期無得外遊嘅關係，台式芋圓更加係成為咗大家搜羅美食嘅一大選擇！對於我呢隻「芋」仙當然亦唔例外。但估唔到為於大角咀嘅呢間芋圓一竟然咁受歡迎！夜晚9－10點嘅時間已經大排長龍，加上限坐令嘅關係，二人位大概等咗半個鐘先有位！當然，美食係值得等待嘅！因為已經食咗正餐嘅關係，兩個人只能叫兩碗芋圓，而同樣出名嘅雪花冰同埋芋圓可能就要留待下次！椰汁海燕窩芋圓椰汁味極濃！而且海燕窩嘅數量不多不少，最重要係芋圓嘅數量極多！！！幾乎每一口糖水都可以至少有一粒芋圓入口，對於「芋」仙們當然係一大喜訊。而每次我哋亦專程叫多咗個岩鹽雪糕，唔好睇佢好似嗽口水咁嘅顏色，岩鹽嘅少少鹹味正好突出咗牛奶嘅濃郁香味。不過整體雪糕都係冰感比較重，如果綿滑些少可能會更出色！桃膠雪燕窩清心丸芋圓除咗一般嘅芋圓之外，當然唔少得養生系列嘅熱食糖水。而桃膠聽個名都知道係養生健康之選，份量亦都係十足！同埋清心丸嘅份量係同芋圓一樣咁多，啖啖入口都一定係大滿足！唯一不足係糖水可能有少少甜，整體嚟講係喺香港食到嘅芋圓店中相當出色。＊順帶一提，芋圓一嘅芋圓係強調每日新鮮即製，價錢份量嚟講亦絕對係超抵食。