英記火鍋海鮮酒家 (已結業)

放假摵起條筋揾朋友嘆茶後逛工展會再睇戲，既然過開海，由屋企出發轉三程車至去到英記⋯⋯都要去嘆餐茶。皮蛋酸薑炸蝦筒必食，相信好少地方會有，現炸熱辣又香脆，面頭舖滿芝麻香氣撲鼻，酸薑跟皮蛋均衡分配，好好味。過橋韮菜卷過一過上湯無咁熱氣，充斥一下韮菜嘅濃烈，醮點辣油(英記自家製的要收$2一碟㗎)更加惹味。馬蹄糕表面吸引，味道清甜，但可惜下面係煎得奇燶，要去掉至放心食。菜苗牛肉腸，粉皮唔會有爛淋嘅口感，而且無芫茜在內最啱我口味。避風塘百花釀茄子最讚，茄子賣相靚仔蝦膠夠彈牙，食得出係借助了「橙色樽蓋」品牌的椒鹽味。麻辣三寶最為失望，上檯個造型已經扣分，麻辣汁好稀唔夠味，三寶就更加唔入味啦，這裡繼紅油抄手之後，這個三寶係第二樣無下次嘅食物。