富都茶餐廳 (已搬遷) 新店位置

星期六, 修道日約了齋妹響千色店集合再入大西北. 到了荃灣, 才找地方醫肚去. 要近近地千色店, 只有來到川龍小巴站呢條街, 找一家茶記, 快人快食. 由街頭行到街尾, 始終都係一句話, 燒臘飯甚少機會出錯. 看見呢間, 吊住幾隻燒鴨. 將其味部擺得出門口, 必定有番咁上下. 好不容易, 找到地方坐低, 不多看Menu有乜好食了, 反正已經欽點了燒臘飯. 聽到不少人叫燒肉飯, 就改一改口味, 來一個叉燒燒肉飯.味部出品, 一定比其他快餐出得快, 只是整一碟熱飯, 斬兩斬. 就成為一份快靚正既港式美食. 叉燒, 是半肥瘦的淋淋叉燒, 而且叉燒汁都落得幾重手. 所以個飯底, 非常之夠味. 燒肉, 為何個個叫呢, 原來佢地既燒肉真係有一手, 皮脆, 味道不太咸. 食落去有如茶樓既燒腩仔咁既質素. (亦可能是我好彩, 切正塊正腩肉俾我. 沒有給我芥辣, 沒有給我甜醬, 伴上的反而是羌蔥. 喜蔥油的我覺得更正.女友來電了, 只好快快耙埋碟飯, 飲埋杯奶茶. 食燒臘亦有個好處, 唔會太熱, 急食時, 唔會辣親五臟六腑.