麻甩系(花甲粉)

營業中

休息中

荃灣又開始好多好嘢食，喺荃灣西附近，開咗一間專食花甲粉，上網睇個份量好似都唔錯，同埋味道好似好吸引，所以今晚兩個人特登過嚟買外賣返屋企試吓。間舖頭嘅裝修都好吸引，大大隻字寫住麻甩系，仲要每款食物都有張圖同埋價錢。叫咗個花甲粉，蒜香味唔太重，但係啲豆卜同埋啲粉吸滿晒佢湯底嘅味道，啲粉軟硬適中，每一條都彈牙。另外叫咗份芝麻雞翼，芝麻雞翼香辣可口，大小適中，咬落去入邊都仲有好多肉汁。個魷魚鬚勁吸引，$36呢個價錢真係唔貴，入邊計計埋埋有成六七條魷魚鬚，同樣炸起上嚟好香口。到最後食完炸嘢梗係要下下火，叫咗個腐竹蛋花糖水，又唔會太甜，同埋入邊有薏米粒，好味。因為外賣關係，拎返屋企嘅時候都已經唔太凍，特登放入雪櫃再雪一雪佢。