梅光軒 (杏花新城) (已結業)

呢間喺杏花邨嘅梅光軒今年年頭開張但我一直未黎食過，尋晚屋企人冇煮飯，收工後終於可以試下了。之前我已去過佢地希慎廣場同埋登龍街分店，味道不錯的，而希慎同埋登龍街店座位偏少，得十幾個位。杏花邨依間大好多，目測有30-40個位左右，空間闊落，而且仲有一棵櫻花樹喺舖內，幾有特色。一坐低店員就送上一杯麥茶，佢推介我食蝦魂($98)，我選擇味噌湯底。拉麵好快就送到，有半熟蛋半隻、一隻蝦、一片叉燒、兩片紫菜、中間有芽菜、蔥同埋辣椒絲。我習慣首先飲兩啖湯先，溫度夠熱，雖然係味噌湯底，但濃度適中，並冇蓋過蝦味。隻蝦都大，D肉好白淨好有鮮味，叉燒普普通通，隻蛋好正。服務方面店員好有禮貌，效率亦高。區內日式拉麵嘅選擇唔多，而呢間嘅食物水準同服務都令我滿意，相信我會再黎幫襯。