兆和茶餐廳

營業中

休息中

行完山喺千色店散隊，準備揾地方醫肚，醒起朝早喺小巴站見對面有間茶記，感覺夠晒街坊，幾個餓鬼拿拿聲走去試吓。多得食客幫手轉枱，我哋先有卡位座。叫咗豬扒米線、牛腩灌湯刀削麵、沙嗲牛出前一丁跟奶油脆朱同火腿奄列。豬扒米線搶先上枱，除咗豬扒仲有雪菜肉絲？入口先知喺鹹酸菜，豬扒係熟識的豉油味，醃得夠晒入味，食落唔死硬，仲係最鍾意的連骨豬扒。米線Q彈，冇煮到過腍，又夠大碗，食得開心。出前一丁同樣冇煮到腍晒發脹，沙嗲牛個汁濃度剛好，搭一兩條青菜，整碗丁麵靚晒。奶油脆朱個樣堅誘惑，夠熱夠香脆，包包烘得金黃，食得出同上巿茶記的出品有好大分別。好彩夠手快搶到半隻獨食。牛腩灌湯刀削麵，牛腩份量多過預期，夠晒腍，仲有牛筋！湯底加咗中藥材，有清香的當歸味，食到紅棗同杞子，感覺似將阿媽煲的老火湯用嚟做湯底咁，充滿住家 Feel。味道唔濃烈，略嫌鹹咗啲啲。刀削麵比較薄身，唔似平時食的厚身版，可能跟米線會更加好。下次行完山，會再嚟試其他嘢。