TC Bistro (已結業)

可能因為地鐵去唔到新蒲崗嘅關係，小編H我一向都好少喺呢一區活動。不過大家知道工廠區代表多公司，多公司嘅地區就代表多餐廳，難得今日要去接個朋友放工，而佢咁啱又係呢一頭返工，所以決定突破自己嘅框框，發掘下呢一區嘅美食地圖。美國特級西冷又係我呢個牛魔王出動嘅時候喇！見到呢塊扒上枱嘅時候就覺得好巨型，因為佢有我前手臂咁長！牛扒仲配埋薯菜，烤蒜頭同埋燒肉汁，份量好足夠！牛扒點左五成熟，切開咗之後就見得到大廚嘅功力深厚，因為佢真係啱啱好五成熟！但係又唔會有血水滲出嚟，正正係因為佢一開始就用大火鎖死咗四邊，等啲肉汁唔會係烹煮嘅過程流晒出嚟！唔好睇小啲配菜，啲薯仔煎香過，金黃色好香口，平時好少食澱粉質嘅我都忍唔住係咁食👹扒波士頓龍蝦配白菌忌廉汁扁意粉對上一次食大大隻龍蝦係喺紐約，返到嚟香港一直都念念不忘，但你哋都知啦，喺香港地食龍蝦真係有錢人嘅玩意，所以今次喺呢間餐廳見到二百幾蚊有交易，即刻決定試一試佢！首先上碟嘅時候龍蝦比我想像中大隻，龍蝦肉都有我手掌咁長。龍蝦肉一啲都唔un又唔會有雪藏味，反而好新鮮好彈牙。雖然意粉唔係主角，但同樣都好出色。意粉口感柔軟度啱啱好，唔會淥到淋晒，亦都唔會太硬生勺勺咁。