旺泰特食

營業中

休息中

好味泰國菜！朋友由細到大都係西貢住，佢推薦得嘅應該真係唔錯，午市套餐都幾抵食，跟湯同飲品。肉碎湯加咗大量菜入去煲，甜甜地幾好味。飲品我揀咗椰奶冰，消暑解渴。青咖喱豬肉$98- 青咖喱微辣，好香，有椰汁味。配菜好多，最鍾意有細粒茄子，吸滿咖喱汁。推介！薄餅$48- 薄餅似烤麵包，唔油膩，就咁食薄餅就冇乜味道，同埋質地偏乾，用嚟點咖喱汁一流！小食拼盤$128- 拼盤共有四款小食: 有春卷、蝦餅、魚餅、荷葉包雞。小食即叫即炸，非常香脆同熱辣辣，雞肉就鞋咗少少，蝦餅、魚餅好彈牙。春卷入邊餡料有好多粉絲，好味！泰式風味炒金邊粉$63- 呢個炒金邊粉一啲都唔油膩，味道偏甜冇乜酸味，入面都有雞肉同蛋絲。朋友話金邊粉嘅品質一直都維持到，推介！海南雞飯$63- 海南雞麻麻哋，賣相冇咁吸引之餘，雞件都比較鞋同埋份量細，唯一可取嘅係海南雞醬幾惹味。