自家麵

營業中

休息中

返工咁辛苦，放工當然要食餐好。但有時太攰，我會寧願返去食個快飯就算。區內夜晚無咩好食，但呢間絕對係少數個人推介小店！話明係小店，環境當然唔算寬敞，不過勝在乾淨企理。除左湯底，可以揀埋麵條粗幼度，唔想食麵嘅重可以轉米線。湯底則分為麻辣、酸辣、胡椒同清湯共4款。除左清湯未試過，其餘3款都唔錯，加上而家天氣凍，胡椒都係一個唔錯選擇，湯底清甜得黎帶有適量胡椒香味，非常驅寒暖胃。店員姨姨熱情有禮貌，落單後好快就有得食~今晚羊肉雖然熟左少少，但肉質都細嫩，加上適中嘅羊羶味，好啱我口味。特別要讚佢地嘅手打麵，每朝新鮮製作，入口爽口彈牙，我特別鍾情佢地寬麵嘅煙韌質感。湯底香濃，味精唔多，飲左1/2湯之後都唔會覺得口渴。份量好足，有時我食左2/3都已經夠哂。區內人情味小店買少見少，感恩依然有佢。