豐鍋雞煲 (荔枝角道) (已結業)

今日行經深水埗見到深水埗地鐵站附近呢一間雞煲店， 好似好吸引所以就入左去試， 餐廳好大，枱與枱之間距離好寬闊， 唔會有同人迫嘅感覺。 而且餐廳感覺好乾淨衛生， 喺疫情時間感覺食得好安心。睇完menu決定要佢嘅滋補螺片花膠雞煲， 雞煲一上場 係一個花膠湯底，煲滾之後，店員會幫你落 雞肉落去 ，根據漏斗時間而去食， 確保雞肉唔會太老亦都唔會未熟。雞肉煮熟咗之後， 店員會叫飲咗個湯底先， 不得不讚佢嘅湯底真係超好飲。食完雞煲裏面嘅湯底，同食咗佢嘅雞肉之後 ，就開始可以叫店員加 湯 打邊爐。火鍋料我哋叫咗佢嘅手工即炸魚皮， 魚皮好大塊唔似出面細細塊， 係即叫即炸， 好脆 ，好好食。另外亦都叫咗佢嘅自創爆芝紫菜響鈴， 響鈴炸到好脆 ，浸咗湯汁之後食落原來裏面係包住一層芝士同紫菜口感好獨特。打邊爐當然唔少得肥牛啦 ，我哋叫咗佢嘅頂級安格斯牛小排 ，牛肉好嫩滑，好好食。佢嘅手工四寶丸亦都好好味唔會有太多粉漿， 好滋味。最後當然要叫個雜菜籃食下菜啦， 尤其是啲菜吸收咗雞湯嘅湯汁，好好食。