天草漁場 (已結業)

星期六黃昏才致電即晚卜枱，預約七點半都有位。上到去發現得一枱客人食緊，心知不妙，散叫左海膽，鵝肝雞翼，天草漁場卷，牛肋條同埋黑松露飯糰，埋單差不多成六百幾。首先最唔抵係牛肋條，成舊水一客，諗住起碼有兩串，點知竟然得一串，只得三寸半長，味道真係好一般。第二係鵝肝雞翼，$58一隻，仲要唔係全翼都咁貴，又燒得唔夠香。最離譜係服務質素，因為冇咩客，成四五個侍應招呼兩枱客人，收碟收得特別快，我地食完上述既野之後，一放低筷子個侍應就衝埋嚟問我地仲叫唔叫野食，一刻都冇得抖下，原本仲諗住叫多Round，但一聽到佢咁問法就咩都唔想食喇，答佢冇喇，佢即刻就收晒枱面d野，一副趕客款，我以為茶餐廳先至會咁對d客人囉，旁邊d枱完全冇人坐，又冇人等位，都唔明點解要趕人走...整體嚟講，得個貴字，但唔值囉。