斗滾 (銀座38) (已搬遷) 新店位置

今次同4位朋友共五個人去試，我地6:30入座食到10點，先講環境地方狹窄，座位唔算舒適，冷氣足夠，洗手間連同擺貨一齊，員工服務不過不失。飲品是自助形式任取，但不包括酒精飲品（需付費）。迷你醬料吧都是自助形式，有炸魚皮/響鈴（可惜冇遮蓋暴露與空氣中）另有韓式麵/公仔麵任取。火鍋配料櫃兩個（都算擺放整齊及衛生）。首先會叫你食雞煲（可唔辣至大辣）可添加，但因為覺得好油加上冇乜肉大部份都係骨，食1轉已足夠。食完雞煲之後就會上海鮮拼盤，份量以人頭計每人一件，有（帶子/鮑魚/開邊蝦/聖子/蜆）帶子同鮑魚都蒸過龍有啲煙靭，開邊蝦唔新鮮，聖子同蜆還可以，中間底部放咗啲烏冬但係完全冇味。跟住就會上一鍋烏雞湯，首先強調叫你飲碗湯先，但係個人認為係味精湯一啲都唔好飲囉。之後攞呢個湯底直接打邊爐，唔知係唔係因為個煲底好厚定係個爐比較弱，成日都唔係好滾得起，開到最大都好慢囉，可能因為個湯底唔好味所以烚出嚟嘅食物都係一般。食到最尾佢有半碗椰汁雪燕，但係都完全冇驚喜囉。