王家沙 (已結業)

昨晚約三位朋友去咗APM睇戲，睇完戲搵嘢食，朋友話想食上海野，所以我哋揀咗黎王家沙食。一坐低，感覺同其他中式菜館冇乜分別，但抬頭一望，就充滿驚喜，因為啲燈掛滿了transformer嘅模型，我同另外一位男仔朋友當然忍唔住不停影相啦！叫菜的責任交咗比兩個女性朋友。前菜，我哋叫咗醉雞、蒜泥白肉卷同王家沙牛肉餅。我自己就比較鍾意個蒜泥白肉卷，一口size, 肉片夠薄，小食一流！個醉雞我就覺得一般般，正常味道啦。但女性朋友同我講，個 menu話呢隻是嘉美雞，嘉美雞係冇激素的，所以食落黎較健康。個牛肉餅都幾juicy同脆囗。主菜我哋當然有叫招牌嘅蟹粉小籠包啦！一咬落去啲湯就咇晒出黎！餡料十足！好好味！之後我哋仲食咗糯米燒賣、清炒河蝦仁同鮮茄蝦仁兩面黃！個糯米燒賣同坊間的糯米包冇乜大分別，不值一提！反而個蝦仁幾爽囗，肉texture較彈牙，食得出啲蝦原材料唔差；個兩面黃就是傳統菜式啦，黎王家沙就是食這種菜式吧！最後我們仲食左個豆沙鍋餅。埋單計每人都係$120, 好超值！