徐記廚房(點心) (已搬遷) 新店位置

徐記廚房點心絕對係良心小店，老闆超好人，又親切，仲會請細路食嘢。所以平心而論，佢嘅質素雖然未必及得上對面嘅一點心，但係肯定更加值得大家去支持。上次幫襯已經係兩個月前，兩個人食，叫咗翠綠叉燒腸，鮮蝦腐皮卷，山竹牛肉，蟹子燒賣皇，鳳爪排骨飯，雪山叉燒包同潮州粉粿，當中最出色嘅係腐皮卷同叉燒包，前者脆卜卜好香口，後者大大個餡料飽滿🤤；另外，牛肉同腸粉都唔錯，前者有牛味冇落太多鬆肉粉，後者夾有一片片翠玉瓜好 fresh 👍；其餘幾樣嘢就正常味道。所有點心即叫即蒸，上枱時全部熱辣辣，呢度又有分加。食到尾聲，老闆娘忽然送上兩碗新研發嘅糖水，佢話仲未正式發售，想先聽取下意見。糖水主要材料係寒天或愛玉（我食唔出😂），蘋果粒，提子乾同白芝麻，有少少似重慶冰粉，唔太甜，味道好清香，我好鍾意。問老闆娘呢碗叫咩名堂，佢諗一諗就話：徐記甘露呀😆。