金龍冰室 (已結業)

放工後過左牛頭角搵朋友，吹多兩句水見肚餓，附近搵下野食啦！呢餐金龍冰室新開張，見都好多食評，所以揀左呢間。八點鐘左右到，入面都滿哂人，好在唔使點等位就入得。門口見到晚餐牌都幾多款幾吸引。入到去仲有個大大本餐牌，成本電話簿咁，勁多野食揀，差啲有選擇困難🙈🙈。最後見到佢有鐵板餐，即刻叫吖！因為已經好少有冰室茶記仲有做鐵板了，難得。朋友再叫多個土匪雞翼，話好想食😆。餐湯一紅一白，紅湯係雜菜湯，無油，好有蕃茄味，幾醒胃。朋友話個白湯有好多粟米，幾好😘。見佢有個叫夠薑奶茶，好特別。入口好重薑蜜味，唔使再加糖。原來薑同奶茶都幾配合幾好飲。星級雜扒好豐富，雞扒、牛扒、煙三文魚、帶子仲有條香草腸仔。見到雞扒大大份已經留口水。牛扒都淋身，配黑椒汁幾好。朋友既牛仔骨都好好，個龍蝦汁又幾好味喎，我試在舊都覺得個牛仔骨幾好食。土匪雞翼望落唔係幾多調味，但食落都幾香口入味，仲唔係好肥，入面肉又多汁。🤤下次經過再來試下佢個炒蛋先，睇相都好吸引。