鋿晶館

營業中

休息中

今晚嚟到上環嘅鋿晶館，鋿晶館一向出名係即場手作點心，但我哋今次試咗小菜，水準真係一流！一入去就見到成個魚缸，啲海鮮睇落非常新鮮。首先，點咗雙拼燒腩仔同叉燒。叉燒分分鐘係我近期最好食嘅，半肥瘦嘅比例啱啱好，肉質腍滑，配埋甜甜地嘅蜜餞，入口即化。燒腩仔更加係出色，脆皮卜卜聲，肉同脂肪完美融合，再加上少少芥辣醬，味道層次即刻提升。之後叫咗金沙大蝦球，呢道菜絕對值得一試！大蝦球外面均勻包住鹹蛋黃，炸得啱啱好，唔會過鹹又帶淡淡金沙香，蝦肉彈牙，咬落去非常爽口。北菇扒豆苗亦都係另一道經典菜式。北菇厚實，炆得好腍，豆苗嫩滑無渣，好鮮甜，非常清新。最後試咗京都焗肉扒。酸酸甜甜嘅京都骨開胃之餘，肉排亦都煎得剛剛好，配搭菠蘿更加突出佢嘅酸甜味。鋿晶館嘅出品咁有水準，原來係因為師傅喺日本東京富麗華同多間米芝蓮餐廳有豐富經驗，難怪每道菜都咁出色！