JUST'er Bar & Restaurant

營業中

休息中

我哋喺門口揭下餐牌，有個好型仔嘅哥哥出嚟介紹有咩嘢食，見有龍蝦就入去試一試。餐廳裝修好有心思，有種懷舊同現代交融嘅感覺。哥哥仔安排咗我哋坐卡位，可以一路望住出邊嘅街景一路食，幾好feel ！菜式啲名好搞笑，我哋叫咗一個「垃圾八爪魚」、「脆炸美國魚柳、多汁淫蝦、慢煮蒜香春雞、炸軟殼蟹配意粉」，加多一壺「三分鐘舒緩經痛玫瑰花茶」😆「垃圾八爪魚」一啲都唔垃圾，薄薄嘅炸皮，裏面嘅八爪魚肉好鮮嫩，咬落去仲好彈牙，一流嘅前菜。「多汁淫蝦」係超大隻龍蝦，多肉多膏，拆起成條蝦肉大大啖咁食超爽！炸魚柳同埋炸軟殼蟹都係超水準，一啲都唔油膩，魚柳既肉夠嫩滑，軟殼蟹炸到卜卜脆，連殼食索索聲，超正！但建議要趁佢熱辣辣即刻食會更加好味。燒春雞嘅蒜香味恰到好處，雞肉超級嫩滑，一撕開仲有好多肉汁流出嚟。最驚喜係個意粉，我鍾意呢款煮得偏硬身少少嘅意粉，加上蕃茄味超級超級濃郁，就咁食一大碟都唔嫌多。食完好嘢，飲返一壺玫瑰花茶係最好嘅配搭，最啱食完嘢一路傾偈一路飲，好relax ！睇返價錢一啲都唔算貴，有大大隻龍蝦、炸軟殼蟹、燒春雞等等，而且全部都咁高質素，下次一定會再嚟食。