元札幌拉麵 (宇晴軒商場) (已結業)

星期五嚮荔枝角處理完d私人野，肚餓唔知食咩好，就醒起附近宇晴軒商場有間日本餐廳，我幾年前嚮荃灣嘅第間分店都食過，都算幾滿意，今次就一於再試下。餐廳店面就唔算話太特別，幾多位，唔算寬落 不過我自己一支公食就無咩所謂。呢度比較好嘅一點就係食物種類非常之多，餐牌都有3-4張，咩類型嘅日本料理都有，拉麵，蓋飯，壽司，定食，小食等等應有盡有，我都心大心細唔知點選擇好。最尾我就order咗個燒油甘魚鮫定食同我嘅致愛鐵板牛利。個燒油甘魚鮫定食都真係幾豐富，有沙律，蒸蛋，湯，岩曬我呢d咩都想試下嘅吃貨，味道都唔錯。講翻個主角燒油甘魚鮫，我覺得真係好正，佢燒到d皮有少少濃濃，但特別香，調味上只係撒咗小小鹽去調味，足以掉曬油甘魚嘅鮮味。燒呢種整法真係無得頂，鎖住曬魚嘅鮮味，特別係d連住魚骨嘅裙邊味最正，食起身又嫩又多汁，非常滿足😋😋😋😋。再講另一樣食物鐵板牛利，切得薄身，比較易入味，應該要有嘅爽嫩都做到，叫上少少燒汁就已經非常好食，好香口😋😋😋。總體黎講，呢間日本餐廳都無令我失望，同我之前嚮荃灣食嘅感覺差唔多。中意試唔同日本野食嘅朋友可以黎試下，價錢又親民，都幾抵食。