紅茶冰室

營業中

休息中

我成日都覺得，午餐同晚餐中間嘅「下午茶時間」其實係多餘嘅，因為個肚根本唔餓，想食嘢都只係口痕，又或者係「為食」。無錯，我為食，我認。 下午茶時間，最邪惡莫過於食西多！不過，有一日經過荃灣，我唔覺得試咗一件由出生到宜家，食完之後感覺最內疚嘅西多——流心芝士西多！ 西多已經夠曬肥，真係無諗過會有「流心芝士西多」咁絕，香港地，真係想唔肥都好難！ 你睇下，西多炸到金黃，上面仲放咗一塊牛油同埋煉奶……一邊等我切，牛油就一邊溶，件西多真係夠新鮮，堅邪惡！一切開，冇咩嘢流出，估計係我呢件做得唔夠流心，不過，聞到芝士味真係幾香！ 金黃嘅西多，外脆內軟，食落有蛋香，甜甜哋；中間嘅芝士入口軟濃，有些少鹹味，不過其實芝士味唔多濃，但係少少流心，同埋啲牛油混合一齊食，切開細細嚿，慢慢食，其實幾滋味。感覺反而無就咁食西多士咁膩呢！