紫荊閣 (已結業)

呢排成日都食日本嘢同韓國菜，舌頭突然好掛住中菜。今晚不如就飲啖湯，炒幾個餸吧！大家唔好誤會，我A姐唔係下廚呀。想食我煮嘅嘢，無咁易。就係因為咁，我哋就去咗紅磡Hotel Sav逸•酒店一樓嘅紫荊閣。去到先知叫化雞要預訂，下次先有得食。最後，有選擇困難症嘅我哋，就叫咗二人套餐，唔洗諗。廚師靚湯M佬一向都好鍾意飲湯，尤其係老火湯。是日廚師靚湯係金銀菜豬肺湯，一打開嗰蓋就見到好多料，一啲都唔馬虎。明顯無加味精，原汁原味，認真推介。薑蔥霸皇雞 (半隻)一嚟到就見到成碟都係薑蔥，好香呀！半隻雞都Okay大隻，份量十足。入口肉質嫩滑，配埋香蔥同薑絲，真係好惹味。蟹肉蛋白炒魚肚呢個絕對係賽磅蟹嘅變奏版，油泡蛋白加上絲絲蟹肉、魚肚同蟹籽，口感豐富，撈飯一流。上湯浸時菜炒菜比較油，上湯浸就啱晒我A姐。菜心爽甜，加埋上湯同蒜頭嘅味道，真係又好味又健康！是日糖水套餐仲附送精選糖水，呢個麥米粥好足料，啖啖都有麥米，而且一啲都唔甜，非常健康。呢個二人餐，試業7折後，都係$438，真係幾抵。即日至9月28日，星期一至四晚市，仲免收加一。想緊貼A姐M佬嘅吃喝玩樂資訊，快啲Follow埋下面嘅Channel啦！