心之食堂 (裝修中)

一聽到心之食堂呢個名，即刻聯想起日本套戲《深夜食堂》😂😂今晚大概九點嚟到，人唔算多，老細安排我地坐喺靠窗位置，呢度真係比到我日式居酒屋感覺!裝修唔會話太奢華，平實得嚟又會令人一見難忘。掛上牆的兩部單車、貼滿鐵板的木門......我地點餐係用本過咗膠的簿，用水筆寫上去再原本交比店員，都幾方便又環保﹗邪惡包首先上桌 (心形碗裝住嗰個，唔記得影獨照)﹗係紫菜包住兩片帶子，兩片帶子裡面又再夾住塊鵝肝，食到我朋友眼都睜唔開，好滋味呀﹗燒物方面我地嗌咗鹽燒雞翼、燒香草豬頸肉同蘆荀海老牛肉卷：朋友好鍾意個雞翼每一啖都好有味，醃得好好！我鍾意豬頸肉好大件，好有口感😍😍蘆荀牛肉卷粒大蝦的味道好突出，同牛肉味好夾，下次嚟一定會覆桌呢味!我地仲嗌咗汁燒牛肉飯同彩虹卷，牛肉飯雖然係用碗裝，但牛肉同飯量都唔少架，味道亦十分唔錯，十分推薦！彩虹卷唔單止賣相靚，材料仲好豐富😍唔使點醬油已經夠晒味道濃郁！最後仲有芝士炸雞（$68）同蒜香烤焗茄子（$68），炸雞連埋拉絲芝士，上枱熱辣辣，正😍茄子蒜味真係超濃，濃到我返到屋企仲有陣陣蒜味喺口腔散發出嚟😂鍾意飲酒嘅朋友可以慢慢揀啲酒品，但我地就無飲，嗌咗蘋果醋醒一醒胃！