咪走雞 (已結業)

知道葵興站開咗一個新嘅商場，叫做KCC，地點其實好方便，喺正葵興站有一條好靚嘅有蓋行人天橋直接駁過商場，落雨都唔驚啦，呢間咪走雞就係呢個商場嘅8樓門面其實都幾有日式風格，而裏面嘅裝修都好雅致，空間感好充足，座位亦都好舒服。六點幾去到，人唔算多，但走嘅時候已經幾乎坐滿。睇一睇餐牌，想豐富少少有二人晚餐，細食嘅亦可揀一人晚餐。今日肚餓想食多啲嘢，最後決定兩個人叫咗二人餐二人套餐包每人一個例湯，今晚飲嘅係紅蘿蔔蓮藕湯，好濃蓮藕味，唔會一味得個咸味，飲完無口乾，應該冇落味精。飲完個例湯，個主角咪走雞就上枱喇，用砂鍋載着，上枱嘅時候仲係吱吱聲，分量夠嘅，雞完全冇骨，雞肉同雞皮都好滑。湯底係沙薑味，真係好特別，裏面仲有木耳同埋菜，好入味另外個西蘭花炒青衣，青衣柳似乎係油泡過再炒嘅，肉質好，唔腥自選咗一個山楂咕嚕肉，上枱嘅時候好夠熱，每一舊肉都係炸到外脆而內有肉汁，唔會死實實，嗰醬酸酸甜甜，特別開胃。當兩個人食到好飽想走嘅時候，竟然唔記得咗原來仲有甜品，送咗兩個木糠布甸過嚟，中餐食西式甜品，幾fusion幾有趣。埋單$228 ，唔使加一。