K-POT 部隊鍋 (已結業)

印象中，韓國部隊鍋係辣嘅，所以唔食得辣嘅我，去韓國時都無去試呢樣韓國咁出名嘅菜式。有日喺元朗搵嘢食期間，行經呢間部隊鍋有人派傳單，見到有好多唔辣嘅湯底揀，仲新出咗個期間限定嘅芝士鍋添，於是就入去試下喇！環境俾人好整潔嘅感覺！未落order,先黎幾碟前菜。我地order咗個芝士湯底，同埋$248嘅美國極上牛肉放題。其實我都唔知個牛肉有無限次數refill, 店員幫我地refill咗一次，之後我哋見食埋其他嘢都已經好飽，所以無特別問店員。個牛肉都幾嫩架！鍾意食牛肉嘅叫呢個貴少少都ok嘅！如果唔係特別鍾意食牛肉，佢仲有另外一啲平啲嘅牛肉放題選擇架！除咗牛肉，佢另外會有一碟牛柳粒，雞同埋魚。而其他火鍋配料，就可以自己出去任拎啦！出面嘅火鍋配料有蔬菜，年糕，菇菌類，午餐肉等等，有年糕有紫薯同原味2種，個人覺得紫薯麻麻地。有串幾特別嘅原來係豆卜！至於個芝士湯底，一啲漏嘅感覺都無，其實唔算好濃味，都ok嘅，因為如果漏嘅話，就食唔到好多餸啦！最後食埋甜品，有女士最鍾意嘅乳酪雪糕，最開心就係可以自己隨意落唔同嘅配料，同埋佢嘅乳酪雪糕又唔會好酸喎！