圓老爺雞煲小廚 (已結業)

突然想食雞煲，於是上Openrice搵搵元朗雞煲，搵到呢間圓老爺雞煲小㕑。經常喺元朗一帶搵食，經過附近都無留意到呢間隱世小店，見到食評全部都係好評，於是就去試下。原來小㕑就喺元朗廣場天橋底附近，地點好方便易搵，附近又有停車場方便泊車。入到店內見裝修都幾新淨，感覺整齊乾淨，員工個個都好有禮貌，招呼周到。我哋點了麻辣重慶雞煲，後來見個星級原條牛肋骨好吸引，於是又叫埋，再叫左一碟小食手拍小黃瓜。麻辣重慶雞煲賣相好吸引，加左芫茜上枱滾一滾就食得，員工好細心咁幫我地撈勻再焗一焗，煮滾之後又換番隻碟墊底，熱住食又唔會一邊煮到乾曬。雞煲唔太辣都易接受，雞肉好嫩滑，洋蔥好爽好甜！星級原條牛肋骨好有驚喜，原條牛骨伴碟實在有氣勢，牛肋肉好肥美，腌得好腍好入味，配沙律菜食無咁膩。手拍小黃瓜好啱中和食肉嘅油膩感，醬汁微辣亦好開胃！加多支啤酒啤一啤！