Le Grand Pokka Café (已結業)

呀～果日七點幾繁忙時間塞車遲左到機場，男友未食野又唔想等飛機餐先食，喺唔多時間下，本身諗住求其衝去食個翠華，點知精明眼嘅我昅到翠華個電子餐牌炒個粉都舊幾水，再幾秒間𥄫到隔離間pokka cafe同平時食嘅價位差唔多，我即刻叫停我衝緊去翠華嘅男友，拉左過去pokka!喺我以為自己好精明嘅時候我入去點嘅係小頹飯⋯我點左最classic嘅肉醬意粉囉，甘人地諗住歐遊唔會食到嘛⋯意粉黎到～份量好勁揪！挽下手淨係叫佢都夠食，（叫左男友影相影好d我個粉，點知⋯⋯）個粉好多芝士，烤焗得幾好，個面夠乾身，芝士熔曬，可以拉芝！肉醬就仲多，好可惜今晩我做左大嘥鬼，食唔曬⋯但上機又好難打包wor...(我幫佢影個安格斯牛肉飯幾靚！）呢個牛飯，唔好睇佢無汁無味道得幾條蘿蔔𢇁呀！本身呢個牛，肉靚，唔算肥但勝在油花均勻，肉質鬆軟，熟度適中唔un唔鞋，重點係佢嘅牛肉鮮甜帶油香。