Poseidon Restaurant & Bar (已結業)

Poseidon係一間樓上酒吧餐廳，我覺得佢最大賣點係私密度高，因為高身卡位如果唔係企高，係完全睇唔倒隔離枱，就好似一個私人包廂咁，加上環境暗暗地，都幾有情調。不過通常哩啲餐廳都會貴夾唔飽，但Poseidon嘅碟頭又出奇地大份， 所以都幾啱情侶黎。Poseidon嘅menu都幾多野揀，前菜小食漢堡飯麵主菜甜品樣樣都有。可樂($28) - 天氣開始熱，坐低叫左杯可樂先，夠冰凍即刻cool down晒。芝士肉醬旋牛油果旋風薯條($88) - 薯條好大份，上面有大大pat肉醬同牛油果蓉，旋風薯條連住少少薯皮，香脆得來仲好有咬口，真係食到停唔倒口。德國豬手配酸椰菜($238) - 德國豬手好大份，絕對夠兩個人食。旁邊除左酸椰菜仲有薯蓉。豬手唔會太鹹，豬手皮仲脆脆地但又唔會太硬，味道都唔錯。總結，野食唔錯，份量偏大份，最鍾意佢個高身卡位，除左之前提到私隱度高之外，喺而家疫情期間，感覺亦比較安心。