麻辣娘子 (新都城中心) (已結業)

同朋友去咗將軍澳行街，見到呢間麻辣娘子，啱晒我哋呢一班鍾意食辣嘅人，所以就決定試吓。餐廳嘅食物種類好多，有辣同埋唔辣嘅選擇，仲有甜品同埋阿里山台式飲品🤩，一次過滿足晒想飲芝士奶蓋同食辣嘅願望。飲品方面叫咗杯芝士奶蓋茉香綠茶，奶蓋好綿好厚，個茶底本身唔係好甜，配埋鹹鹹地嘅芝士奶蓋，超級夾，食咗太多辣之後飲一啖，即刻舒服晒😂主菜方面叫咗個脆皮小豆腐同埋麻辣重慶毛血旺，呢兩個主菜送飯一流，建議大家可以叫個白飯🤣。脆皮小豆腐嘅脆皮好薄好脆！入面嘅豆腐仲keep到好嫩滑！調味方面都啱啱好，食唔到辣嘅朋友可以試吓叫呢個～麻辣重慶毛血旺入面嘅配料好豐富！啲毛血旺配埋啲麻辣汁一齊食好過癮😝我鍾意呢個餸係麻多過辣～唔會話真係食到好辛苦，但係又可以過吓辣嘅口癮！食完主菜梗係要叫返個甜品！叫咗個黑糖桂花冰粉，食完辣野之後再食呢個感覺好清爽好解辣，個冰粉好爽，加上個湯底唔會話好甜，好適合食完辣野叫嚟食！我哋仲叫咗個紅糖糍粑，呢個甜品真心好食！！！強烈推薦大家要叫一個試吓！佢外面個皮好脆，但係入面嗰糍粑煙煙韌韌，配埋出面個甜甜地嘅紅糖，超級好食！鍾意煙韌甜品嘅朋友一定要試吓😋😋