新華園燒臘粉麵茶餐廳 (已結業)

返工前去食個早餐，揀左近地鐵站o既新華園，我自己未食過呢間，但趕住食完返工所以揀左呢間。8點35分入去坐，得小貓三隻。要左個最basic o既早餐A，即係火腿通粉，牛油包及腸仔煎雙蛋。先黎火腿通粉，冇乜特別，食完咁滯，杯奶茶都仲未到。等左10分鐘，杯奶茶先到，但杯奶茶好難飲，飲落口係苦o既，又冇茶味，飲飲下我都放棄。食曬通粉，但腸仔煎蛋都仲未到，果陣已經8:55，我返9點。見到得一個人，煎野又係佢，收銀又係佢，落單又係佢，但我真係趕時間，於是同阿叔講，佢話: "嗱，煎好喇，你坐返埋位先喇"....既然佢咁講，唯有坐返埋位。一食，真係好難食，連腸仔煎雙蛋呢d咁簡單o既都整到咁難食真係好少有。條腸一般，我都煎得出。隻蛋，冇蛋味，淨係食到一陣油"益"味，而且蛋黃已經係熟透，我都冇話要熟蛋，仲要係全熟.....連食都唔想再食落去，埋單走人，返到公司聞到自己一陣油"益"味，呢餐早餐真係食到個人好冇精神。