何蘭正

營業中

休息中

就算係平日6點半都差唔多7成滿座，記得一定要book位，因為遲book嘅關係所以坐吧枱。服務有禮貌，十分唔錯，有加一收費，但冇限時，而且我好欣賞碟有加熱保暖。*24小時慢煮伊比利亞叉燒配日本溫泉蛋，紅洋蔥漬，香噴噴香蔥豬油撈飯 $198（+$100 配煎西班牙肥鴨肝）半肥瘦叉燒肉質軟腍，有肉香又有油香，調味偏向鹹香，多啲蜜糖味會更加似叉燒。肥鴨肝必須加！煎到金黃，滿滿嘅油脂香，配飯配叉燒都好強。反而豬油撈飯略為失色，油香未夠強之餘，配叉燒/鴨肝顯得過份油膩。鹽味焦黃牛油煎杏鮑菇，大火炒鶴藪白菜，法式幼滑薯蓉，焦香老蛋茄茸汁 $168估你唔到咁好食！杏鮑菇厚切可以當扒咁鋸，𠝹花後更加索到牛油香。番茄炒蛋+薯蓉意外地夾，用鶴藪撈埋食都好夾。薯蓉好滑又唔膩，加埋甜甜嘅茄茸汁好好味。熔岩啤 Mother goat doppelbock $75店員介紹熔岩啤係德式啤酒，印象中佢講解係德國人冬天想飲啤酒又怕凍，所以要加熱啤酒。就咁單飲係麥味香濃嘅啤酒，之後店員會燒紅鐵棒再放入啤酒加熱，即刻好多泡泡炸出嚟。飲落啤酒泡暖暖哋，啤酒仲凍，有種飲dirty嘅感覺，仲多咗種焦糖甜味。