High Bar by Mak's Beer

營業中

休息中

酒類飲品選擇好多，環境亦好好，海景好開陽，枱與枱之間空間感亦都好夠，裝修有設計感，係適合傾偈嘅好地方。可惜今次男朋友選擇咗慶祝周年用，但開份Menu選擇勁少，八點未到海鮮拼盤已經冇咗，主菜選擇太少，喺好肚餓嘅情況下，我揀咗風乾火腿三重芝士意粉、軟殼蟹脆意大利飯，兩個都頗為失望。成餐飯我淨係影咗呢一張相為證，賣相好好，軟殼蟹好食嘅，唔似出面咁又好厚嘅炸粉，幾有蟹味，但我強烈提醒唔鍾意食軟飯嘅人千祈唔好叫呢度嘅意大利飯，我睇返之前嘅食評先知又係出事，我畢咗兩啖已經唔想再食，啲汁同個飯根本係割裂嘅完全入唔到味，個飯又淋得滯，所謂嘅脆就好似你炒飯有個焦嘅底咁，可能等我冇牙先食啦。至於風乾火腿意粉其實意粉質素OK嘅，反而嗰個份量就勁多，造型咁本身都唔錯㗎，塊風乾火腿意粉好似風帆咁企咗喺度，但成件事好似食緊豬肉紙咁，我又係食咗兩啖唔想再食落去，呢間餐廳嘅份量比例非常之奇怪。由於心情已經好差，所以冇再特別影相啦，成間嘢最高質係飲品同埋環境，去打吓卡朋友影相傾吓偈係好地方，食晚飯就真係唔建議，如果慶祝特別日子嘅請你諗諗另一半係重視環境定係重視食物，如果係後者嘅話請你揀過第二間。