膠得喜 (已結業)

我好貪靚㗎，平時都好鍾意食花膠養顏，見到佐敦開咗間花膠餐廳 ，當然要第一時間去嚐鮮。嘩!餐牌好豐富呀!勁多花膠菜式，花多眼亂，店員好友善，會主動介紹菜式 。嗌咗金箔三式花膠撈麵，花膠黑松露炒蛋厚多士，同埋響螺淮山杞子花膠燉雞。先飲個湯，個湯好足料，味道鮮甜，仲有塊花膠係入面，囡囡飲到舐舐脷，大讚好飲。金箔三色花膠撈麵賣相超矜貴，用咗三款唔同嘅花膠去做，面頭嘅金箔金光閃閃好吸引。花膠有一定厚度，有咬口，膠質重，每一啖都是膠原。 花膠黑松露炒蛋多士，多士烘得脆卜卜，炒蛋滑溜有黑松露香味，仲有好多花膠粒粒 ，係好有新意嘅小食。呢度仲坐得都幾闊落，舒舒服服歎花膠，真係人生一大樂事!