春水堂 (太古城中心)

營業中

休息中

係太古行耐左想坐低飲杯嘢，就同朋友入去春水堂試下啦。黃金香酥雞（$48）雞嘅份量唔算多，不過都炸得幾香脆。外面層炸粉唔會好厚，而且上面仲有啲椒鹽調味，食落好香好好味。滷香牛筋（$58）牛筋滷得好香，食落好入味同好淋。上面仲有啲芫茜、薑同辣椒，點埋佢附送嘅辣椒油仲香，辣辣地幾好食。就咁睇份量好似好多咁，但其實牛筋下面係有啲芽菜黎墊底，所以份量唔算太多，不過配埋芽菜食都幾清爽。香醇奶茶（$30）奶茶叫左走冰微糖，雖然係微糖但係飲落都係偏甜嘅。成杯都幾順口同幾香奶味。珍珠鐵觀音奶茶（$34）同樣都係叫左走冰微糖，都係偏甜。同奶茶比就多左啲鐵觀音嘅香味，不過唔算太重。珍珠都幾多，食落啱啱好唔會話煮唔熟或者太硬嗰啲。整體黎講啲嘢食都唔錯，份量唔算太多，而嘢飲就相對比較普通。收埋加一之後盛惠$187，都係偏貴嘅。