東記雞煲烤魚火鍋點心餃子 (已結業)

Item: 東記雞煲烤魚火鍋點心餃子
Rating: 3
Author: 奧志雷

3.5

18 食評

味道

環境

服務

衛生

抵食

615

上水

$50以下

粵菜 (廣東) 川菜 (四川) 火鍋點心雞煲

奧志雷

等級4

2.1K

發現新大陸 ﹗沒有神州來嚇淹致，終於可以清清靜靜嘆嘆茶，悠然自得一盅三件。全場只得小貓三四個食客，真係好舒服。牆上貼著多款特色羊腩煲，想都無想過，試到無試過，非常好奇又吸引﹗

全部點心即叫即蒸無偷懶，滾熱辣非常有誠意，請耐心等候。師傅球類好得超美味，鯪魚球牛肉球，蒸飯類都好得，比街市更勝一籌﹗色香味都比九里香、唐記、點盅皇更出色﹗街市東莞佬、城記望塵莫及，如跟馬仔記、新明苑能爭一日之長短。

早前到訪，四眼肥佬是否老闆，零晨沒招呼？完全行行企企，當我地透明懶得理 ﹗朝早嬸嬸們非常熱情有禮有招乎架喎。老人家的日常一盅兩件，即叫即蒸必須耐心等候。水滾茶靚，嘆幾杯甘香鐵觀音醒醒神先，不到十分鐘嬸嬸端上熱騰騰噴煙蒸籠。

鳳爪排骨蒸飯，沒有淨排骨飯呢 ﹗轉眼蒸飯到達，預先煮好正常不過。暖暖的溫度滿意，鳳爪 18 層地獄咸，頂唔緊﹗排骨斬得的骰還可以，半骨半肉半軟骨，骨多肉少，鬆軟肉質，甜甜黏黏滑滑，蠻喜歡不錯不錯。豉椒份量足夠，跟甜豉油撈飯，格外香口無破綻。飯粒煮得靚靚，飯香飄逸醒神，乾濕適中。甜豉油調得清香不濁，開胃越食越想食 ﹗突然諗起早前上水金都酒樓及紅磡寶城不開心經驗，極咸豉油嚇死朕，現在還心有餘悸。

東記蝦餃皇，太大粒喇麻，好飽啊 ﹗一口點心就最好啦。噴住煙送到，煙霧瀰漫滿有氣氛，非常生猛碌到四散各據一方。我本想移返中間擺得靚靚先影相，但黐得好實費事煩喇。皇者風範夠巨形，成粒啪有點壓力，分兩啖舒服多﹗餃皮濕度高黏黏嚥韌，有蔥有筍緊抱著蝦仁，爽甜水潤，味道清新，可口味美，高質無得彈。

蟹子燒賣皇，跟蝦蛟皇一樣巨形 ﹗香噴噴燙燙的品嚐，大粒到要慢慢咬，結實像肉丸，大量蝦膠，趙得到蝦肉粒。蝦膠比豬肉份量多，落味有點淡，豬肉香甜欠棒，都滿足好味道，如有豆瓣醬會更精彩。

淮山雞紮，雞柳彈滑，味甜高質。魚肚吸盡精華，濕爽比豬皮好味，最衰未到綿滑系。火腿咸香爽彈，芋頭我不吃的。淮山片乾乾的不喜歡，咬半條放棄，淮山方條好食百倍。魚肚雞柳送排骨飯，一流好好味﹗

薑蔥牛柏葉，滾熱辣出現，芡汁厚薄得宜，薑蔥甜美清爽。葉先生 Albert Yip 入口爽爽，但有少少韌，都好味道的。豉椒蒸排骨，骨多肉少，香甜不太油不太肥，鬆軟肉甜食得過。北菇棉花雞，魚肚高質爽彈，只甜不腥不嗅。雞柳嫩滑鬆化，美味無比。

鵪鶉蛋燒賣，巨形不能一啖吞噬，分兩口係差少少。甘甜彈滑蛋蛋用多汁可口肉球盛著，淡撞濃、甜撞甘，精彩萬分，好好好味呀﹗八寶糯米雞，數唔到八樣喎？鵪鶉蛋縮水乾爭爭，雞柳結實油潤，肉鬆夾雜肥豬肉有咬口，冬菇偏瘦削。糯米飯濕潤不黏黏乾硬，味道單調偏淡平凡，當無餸飯食。幸好我有棉花雞、排骨搭做餸，即時好食百倍。

蠔皇鮮竹卷，芹菜芫茜頂硬上，免強吞下，由細到大入口就想反胃。香芋鴨腳紮，最討厭的芋頭不吃。鴨腳皮爽筋彈，咸咸不甜的醃味，加上油淋淋肉球及香滑腐皮，還入得口。土魷蒸肉餅飯，有彈有滑有肉味有魷味，散發海味香特別開胃。飯粒真的煮得超水準，粒粒飯香非凡，嚥韌飽滿乾爽，熱熱撈埋清爽甜豉油，非常美味﹗

咖哩牛肉餃子湯，死實陰沉的味精湯，散發最可怕的生蔥腥味打冷震 ﹗餃子牛肉餡跟山竹牛肉百份百一樣，只是多一點咖哩粉味，格硬食不浪費，都幾難食喎。鮮竹牛肉球，用筷子壓上一開二，感覺蛋白一般充滿彈性，入口濕滑舒服。勁茜味道還頂得住，還有淡淡牛肉香，西洋菜底爽甜多汁。什醬蒸鳳爪，醬汁厚薄得宜，包著鳳爪每吋肌膚，而且有修甲喎 ﹗師傅夠細心。皮爽濕潤微甜香辣惹味，味道複雜的可愛混醬，必食之選。

北菇蒸雞飯，剛剛賣晒 ﹗嬸嬸問等還是轉其他，我唔趕時間當然等啦。期間想起可能係全香港最好食的曉廚軒北菇蒸雞飯用上頂級靚雞柳啖啖肉沒有骨，不知道東記有骨定無骨架？苦候廿十分鐘的即蒸雞飯。嬸嬸立即送到，係無骨雞柳黎架，實在太好太高興﹗雞柳放一旁，將豉油跟飯粒撈得均勻，直接大大啖塞入口，驚喜不已 ﹗看似濕淋淋的飯完來全是雞柳精華，雞汁雞油跟甜豉油融合，美味佳餚程現﹗飯香無限，飽滿韌性，色香味可媲美曉廚軒頂級雞飯﹗雞柳嫩滑，雞柳醃味濃郁醇香，搭著靚飯品嚐，停不了的節奏，食食食食食，完美無暇的演譯﹗

鯪魚球，鮮彈嫩滑，足料魚香，不粉不硬實。魚汁輕滲甜美，混著胡椒及喼汁，擦出火花，味道被引燃昇華 ﹗其實早已經飽飽，但都忍不住其攝人魔力﹗一定一定要全部消滅才可以停下來，鯪魚球鯪魚球鯪魚球﹗叉燒腸粉，勁茜叉腸 ﹗近年免強受得住其獨特的茜味，反應不太劇烈，不會反胃嘔吐喇。不過依幾條芫茜味太濃，其他味道都食唔到咯。叉燒份量夠，鬆軟甘甜，腸皮質地微黏微滑蠻不錯。

煎蛋牛肉飯，煎蛋分開用碟仔另上？罕見密封式牛肉蒸飯，所有精華氣味肉香汁液鎖得實一實 ﹗豉油似乎落得過多，不過食落味道竟然剛剛好。甜豉油清香不咸不濁，醒神醒胃，使得我食慾全開﹗飯香無比，飯粒嚥韌乾爽有趙口，搭載滑牛蛋汁甜豉油，一啖兩啖大大啖不停輸送，忘我地欲罷不能。精彩萬分，夾得天衣無縫 1 加 1 加 1 無敵鐵三角，小宇宙爆發 ﹗蛋漿、嫩牛、白飯，無可挑剔的佳餚。