古今二 (荃灣千色匯I) (已結業)

去荃灣買完嘢搵個地方坐低醫下肚，行咗一圈揀咗呢間主打創意卷物嘅日式餐廳，空間寬敞，感覺開揚舒適。食物方面選擇超級多，特別係卷物，簡直可以用花多眼亂嚟形容，反正第一次食，隨意點咗一份沙律、兩款卷物同野菜鍋。龍捲風沙律望落平平無奇，有西生菜、中華沙律、蟹柳、蟹籽同脆片，配上日式醬汁，入口無論味道同口感都好有驚喜。兩款卷物賣相精緻，而且份量好足，絕對唔驚食唔飽。第一款送上嘅卷物係忘不了你，呢個名非常新奇，但入口之後居然令人有啲認同，芒果、炸牛肉同芝士呢個配搭本身就好合襯，加上芥末、沙律同日式醬汁，有齊鹹、甜同辣三種味道，入口層次豐富又帶點刺激，令人食唔停口，好有驚喜！另一款卷物係午夜牛郎，壽司飯加入三文魚、牛油果同芝士，外層裹上薄薄嘅炸漿去炸，更加香口，簡單配上日式沙律醬已經帶出三文魚同牛油果嘅鮮香。野菜鍋算大份，湯底味道清甜，食完沙律同卷物，再整返鍋熱辣辣嘅野菜鍋，成身都暖笠笠。餐廳食物質素唔錯，而且好有創意，特別係卷物，配搭多變有驚喜，令人想食匀咁多款式！