夢の丼 (已結業)

相信好多香港人喺無得返鄉下（日本）呢段日子，個個都想搵到一間可以畀你如置身於日本嘅料理店。好慶幸，今日搵到一間，喺夢之丼用餐嘅2個小時，無論係食物、餐具器皿、服務，甚至乎廁所都有返咗去日本既感覺。食物方面叫咗一個夢之丼，一個花錦魚生丼，兩個招牌菜-磯燒帆立貝、柔煮鮑魚，同埋兩份刺身。呢度既丼飯係用咗醬油調味，唔單止色水吸引仲要味道好配魚生一齊食。再講多啲呢道夢之丼所用既魚生，除咗有大大粒帶子，珍寶size既蝦，仲有三文魚子、吞拿魚、蟹肉，真係你想要嘅都有，不愧為夢幻之丼。另外兩個煮物都好好味，食既時候感受到廚師制作時嘅心思，好似鮑魚，竟然煮到一咬就溶化嘅口感。除咗食物，呢度既工作人員都非常專業，服務到位，例如我哋個份磯燒帆立貝等咗一段時間，未開口追，侍應已經主動幫我哋跟進。Overall呢間餐廳係方方面面都比到喺日本食飯嘅感受。