品甜 (已結業)

今日第一次黎呢度食，8.00左右都唔洗等位，好快就有入到去。首先黎嘅係義大利風乾火腿配蜜瓜沙律。薄薄嘅火腿帶有少少鹹味，配上鮮甜嘅密瓜，唔錯唔錯。我地叫左一個廚師精選嘅醬燒豬肋配松露薯蓉。豬肋骨好入味，熟度岩岩好，肉質香嫩，同個醬都好夾。薯蓉配上一粒粒嘅黑松露，非常香濃。甜品方面，有呢個阿拉斯加士多啤梨流心藍莓芝士馬鈴，打發完嘅蛋白包住藍莓同士多啤梨乳酪芝士，底層有鬆軟嘅海綿蛋糕同香脆曲奇做餅底，非常之特別。我地叫嘅係荔枝紅莓玫瑰梳乎里配雪糕，但係佢俾錯左黑糖薑汁味嘅梳乎里。梳乎里有好香濃薑味配上甜而不膩嘅黑糖，慢慢於舌頭上融化。佢嘅草莓雪糕入面有士多啤梨粒，味道非常好。美中不足嘅係因為梳乎里俾錯左味，所以同雪糕唔夾，不過就咁分開食都已經好好味。綜括而言呢間野水準唔錯，食物質素同價錢相符。員工態度友善，有禮，不過上菜速度就有點慢，如果趕時間就留一下喇。