埠 (已結業)

星期六下午去海馬公園，所以午餐就過咗去筲箕灣搵食。之前已經搵左呢間埠，見佢啲lunch set同串燒都好好食咁樣，今日終於都有機會試到。經理好好咁安排左我哋坐埋窗邊，可以望住過海景食野，個人嘅心情都特別舒暢。自己本身好鍾意食鰻魚，所以就叫左呢度嘅鰻魚釜飯三食，而女朋友就是叫咗一個串燒定食，貪佢乜都有啲可以試到多啲唔同嘅嘢。鰻魚魚肉細緻，油脂適中，不會太乾身，魚皮微微焦香，入口即溶，美味非常。話明鰻魚三食，除咗配上原有鰻魚燒汁一食外，亦都可以加上芝麻、香蔥同紫菜，配合少少wasabi ，呢個配搭有意想不到嘅清新。第三食就係再加上熱湯，令到你即使慢慢食，食到最尾都可以有熱辣辣嘅感覺。三種食法各有風味，每一種食法都刺激你的味蕾，絕對可以帶到俾你驚喜。最後食埋個忌廉泡芙，咁就完美啦。