孖啡 (已結業)

上星期約左個fd食飯，當然揀個就腳既地方方便大家，咁旺角自然就係不二之選。最後去左呢間DoubleCafe，貪佢私密度夠高，大家容易傾偈。間野係高氏大樓，姐係彌敦道同登打士街交界間周大福對面，都算好容易搵。上到去一出電梯，已經聞到非常濃烈的龍蝦香味，唔講會以為呢間cafe主打食龍蝦。行到入舖，燈光微微幽暗，配上有古典風既傢私，幾有情調。坐低睇睇餐牌，set dinner都有成十款揀，算幾多選擇，重點係另外重可以加錢配個龍蝦湯或者甜品。既然一入黎已經聞到龍蝦湯的香味，咁呢樣就一定要試啦！個人本身都幾鍾意食焗野，所以主食就揀左芝士焗吞拿魚天使麵。飲品我就揀左最喜歡既Oreo奶昔，但由於個餐只包一杯$38的飲品，所以要補返少少差額。個湯好合理地最快黎到，首先要讚係夠晒熱，聞落真係好香，而且飲落個龍蝦味都相當濃郁，不過就略為咸左少少，師傅下次可能可以輕手Ｄ。跟住黎既就係杯奶昔，好重Oreo味，肯定落足料，加埋上面個cream，飲落非常滑。個人覺得呢杯奶昔比頭先個湯更正，非常值得推介！最後到個天使麵，賣相都唔錯，但食落就有少少失望，因為岩岩焗出黎入面居然唔太熱，而且個麵唔夠乾身，似乎多左少少水。