鮮魚湯 (已結業)

繼續食勻新北江系列，上次經過煮八見到呢間魚湯專門店，今日就決定黎試吓。餐廳主打魚湯，可以選配粉麵或飯，亦有煎魚及麻辣小菜，選擇夠晒多。今日叫咗呢個"卷出滋味"，分別有墨魚卷，墨魚蝦卷及魚肉春卷各兩條，因為唔想破壞魚湯味道，所以揀咗配河粉。河粉上檯時份量比想像中大，同普通粉麵店唔同，呢度用主打嘅魚湯做湯底，魚湯呈奶白色，飲落相當鮮甜，唔覺得有落味精，三款春卷中以墨魚卷最為爽口彈牙，個人認為唔駛點泰式辣醬都夠味。總括黎講，呢度嘅魚湯相當好味，等天氣再凍啲真係要試埋佢個湯飯。