小漁港海鮮舫 鮮蒸‧鮮味火鍋

營業中

休息中

好友大肚唔食得刺身又想食海鮮，於是揀咗蒸海鮮。負責訂枱嘅話喺openrice見食評唔錯所以試一試。佢哋算係廚師發辦形式，menu只寫有幾款海鮮，幾款配菜，要落單時問侍應先知。我哋當日因為只得3個人，所以只可以揀$398/位嗰款餐，另外有一款$498/位要6人以上先可以揀。上蒸海鮮之前先上一盤刺身，然後就係龍蝦同斑馬瀨尿蝦，侍應姐姐會全程幫你蒸，自己完全唔使郁手。佢先將龍蝦頭同腳拆落嚟放入鍋煲粥，然後再喺上面蒸龍蝦同瀨尿蝦，侍應姐姐會set好時間，夠鐘嗌佢過嚟就ok，佢會幫忙夾上嚟再放其他海鮮落去蒸，如是者直到你食到雞件蒸烏冬為止，最後就係充滿海鮮精華嘅粥。龍蝦同瀨尿蝦好新鮮，而且瀨尿蝦將近有女仔前臂咁長，蝦同扇貝都好食，沙白一般，青口我唔食唔知好唔好味。蟶子唔算大隻但冇沙，另外仲有鮑魚同馬友。尾聲的雞件蒸烏冬有驚喜，雞油滲晒落手打烏冬度，好夠味，不過啲南瓜同芋頭都偏硬。最後因為食到好飽，個粥食唔落要打包，但煲得好綿又好鮮，宵夜直接成兜食晒。