鴨子園 (已結業)

頌富商場變左做T Town後，都無黎過，近來開左啲有特色嘅餐廳，吸引左我過黎行下同食嘢。鴨子園係食鴨主題嘅上海菜，今次同屋企人黎，應該都幾啱食。生磨豆漿$15: 真係同出面賣嘅豆漿有唔同，質感濃厚，豆味香濃唔太甜。鴨肉小籠包$43: 呢個小籠包相當有驚喜，個皮好薄但有靭性，唔易穿，裡面包住好多湯汁，打開少少先啜湯汁，充滿鴨香，肉餡鬆軟細滑。紅油抄手$43: 皮好薄嘅雲吞，包住軟熟又有肉汁嘅菜肉餡，沾上幾多辣汁悉隨專便，都唔會好辣。鱔糊湯麵$70: 鱔糊煮到好濃好香，加上幾多芽菜，唔會覺得膩，鱔魚肉有彈性，口感唔錯，建議同麵分開食，如果撈埋個湯會好似豉油咁味，分開清清地仲好味，個麵就有啲偏淋，普通啦。腿蓉津白$70: 津白即係黃芽白，本身都有種清甜味，煮到淋一淋時陣甜味更加出，間中食到佢啲火腿蓉，咸香得來剛好。