寶膳餐廳

營業中

休息中

九龍人甚少去鴨脷洲，難得一場嚟到，當然要幫襯下呢度嘅著名良心店 Bowls Cafe。先嚟餐湯，今日係南瓜忌廉湯，我一向麻麻哋南瓜，因為覺得太甜，呢度嘅南瓜忌廉湯就冇呢個問題，唔太甜之餘仲飲得到南瓜蓉，非常高質。蒜蓉包都好食，又脆蒜蓉味又濃。主菜我揀咗軟殼蟹蕃茄海鮮意大利飯，呢個又係好正，risotto 煮得啱啱好唔會太腍，醬汁蕃茄味濃郁但又唔會好酸，飯入面仲有份量唔少嘅雜菇同海鮮粒，令到每啖飯都好豐富好滋味。至於面頭隻軟殼蟹呢，就估唔到會咁大隻，大隻嘅好處係肉比較多，但就冇出面啲炸得咁脆，我就覺得好 OK 啦。最後甜品係麵包布甸，呢個又係勁正，唔太甜，肉桂味同蛋味都好濃，好好食。嚟多杯即磨咖啡，就係超圓滿嘅一餐🥰。