喜聚火鍋雞煲專門店

營業中

休息中

成日係社交媒體見到喜聚賣廣告，成班男人睇下睇下，就心郁郁想試下，今晚終於約齊人上去會一會佢。餐廳有四個放題選擇，只有第三同第四個係無時限任食，同任飲生啤，其他兩個只有兩小時，我哋幾個麻甩佬梗係二話不說揀左最貴嗰個，喪飲生啤。一揀好食邊個餐就9秒9點個啤酒塔先，第一個先來Sapporo日本生啤，然後先叫店員落個惹味花膠雞煲，食完再打邊爐。雞煲揀左小辣，但係辣度都幾勁，雞件份量唔算多，一人兩三件就食完，不過唔會死咸，任食來講都抵讚。一邊食雞煲，避風塘海鮮山同刺身拼盤都上枱，個海鮮山來到有啲失望，得幾隻蝦同瀨尿蝦，係調味搭夠。刺身解凍得幾好，唔會一大陣雪味，款式都成十款，不過要食快啲，因為墊底冰塊溶得好快。食完雞煲就來左個蒸海鮮，有鮑魚，元貝同龍躉片，個頭小小但係新鮮，少少蒜蓉調味就足夠。之後當然係打邊爐，我哋就咁用清湯碌牛，主食黑毛和牛同安格斯牛小排，兩隻牛味都夠，同肉質唔柴，外面都有好多款配料可以自取，特別推介豬潤，相當鮮嫩。不經不覺由七點幾食到十二點，啤酒塔都飲完四個，之後每人再追加一杯生啤作結，埋單都唔使四百一個人，又食又飲真係去邊揾，不過餐廳冷氣好勁，同食完會成身味，大家要留意下。