名館 (黃埔天地) (已結業)

好友飯局，今次揀咗黄埔美食坊嘅名館聚一聚。小館格局，座位寬敞，坐得舒服，餐牌選擇不少，最啱我哋呢班心思多多，鍾意嘗新嘅食客。先嚟隻紅燒嫩滑B B鴿，熱辣辣上枱，皮脆肉嫩，水準之作。蜂蜜柚子蝦球，酸酸甜甜嘅醬汁，配上爽口彈牙嘅大蝦球，口感清新又美味。座中有人嗜辣，所以點咗個沸騰水煮滑魚片，紅噹噹一大盆，一睇就知唔少嘢，又麻又辣，魚片都夠嫩滑，真係食到大汗叠細汗。私房金黃球泡飯賣相特别，銅鍋內一個金黃色嘅波波炸飯球，配埋蕃茄、鮮菇、豬肉嘅濃湯嚟食，賣相别緻新穎，鮮美可口，值得一試。蜜椒土豆安格斯牛柳粒，賣相同味道都算合格，普普通通喇。鮮肉一口小籠包，皮薄餡料鮮嫩，不俗。生煎韮菜餃，皮脆內軟，香濃惹味，讚！總括而言，食物水準不俗，價錢亦算合理，聚腳飯局又多一個好選擇。